ՎԻԼՅԱՄ ՍԱՐՈՅԱՆԻ «ՈՍՏՐԵՆ ՈՒ ՄԱՐԳԱՐԻՏԸ»
Վանաձորի Հովհ. Աբելյանի անվան պետթատրոնում նոյեմբերի 22-ին պրեմիերա էր. բեմադրվեց Վիլյամ Սարոյանի «Ոստրեն ու մարգարիտը» փոքր դրաման Էլֆիք Զոհրաբյանի թարգմանությամբ: Ներկայացման բեմադրիչն է Արեն Օսիպյանը: Հաջող դերակատարումներով այս բեմադրությունն ուներ նոր շունչ, նորովի մոտեցում Սարոյանի գողտրիկ ստեղծագործությանը: Երիտասարդ բեմադրիչն ավելի շատ ընդգծել էր պիեսի դրամատիզմը, շեշտադրել ընտանիքի թեման: «Ոստրեն ու մարգարիտը» հաղթող էր ճանաչվել Երևանի քաղաքապետարանի հայտարարած մրցույթում և ֆինանսավորվել: Ըստ պայմանի՝ 2024-ին այն երկու անգամ պետք է ներկայացվի նաև մայրաքաղաքում: Հանդիսատեսը ջերմությամբ ընդունեց ներկայացումը:
«Ոստրեն ու Մարգարիտը» պիեսի հիմքում ընտանիքի պահպանման խորհուրդն է: Ընտանեկան դժվարին իրավիճակը գրողը ներկայացնում է Քլարքի որդի պատանի Քլեյի զգացմունքների ու ապրումների միջոցով: Անհոգ երեխան բախվում է կյանքի դժվարությանը: Մոռանալով իր մանկական խաղերն ու անհոգությունը՝ երեխան մտածում է միայն հորը տուն վերադարձնելու մասին: Սարոյան գրողի բարությունը չէր կարող անհայր թողնել փոքրիկ հերոսին: «Ոստրեն ու մարգարիտը» համարվում է «հույսի գրականության» լավագույն սիմվոլիստական գործերից:
Զգեստները և նկարչական ձևավորումը` Սարգիս Մանուկյանի
Կոմպոզիտոր` Գոռ Թադևոսյան
Պլաստիկ լուծումները` Արման Սաքանյանի
Դերերում`
Հարրի Վան Դյուսեն — Սարգիս Ավետիսյան
Քլեյ Լարրաբի — Սարգիս Ալեքյան
Վիվիեն Մըքքաչիըն — Մարիամ Ղևոնդյան, Նոնա Սաֆարյան
Քլարք Լարրաբի — Արթուր Պապիկյան, Վահրամ Խառատյան
Տղամարդ (գրող) — ՀՀ վաստակավոր արտիստ Հայկ Թորոսյան
Դատավոր Էփլգարթ — Էլֆիք Զոհրաբյան, Համլետ Գյուլզադյան
Ուոզզեք — Արման Սաքանյան
Սպասարկող — Էդգար Բարսեղյան
Գրիլի (Քլեյի ընկերը) — Դավիթ Պողոսյան
Ռոքի (Քլեյի ընկերը) — Վազգեն Բադալյան
Սեփ. լրատվություն
